മംഗളൂരു: ധര്മസ്ഥലയില് കൂട്ട സംസ്കാരം നടന്നുവെന്ന മുന് ശുചീകരണ തൊഴിലാളിയുടെ വെളിപ്പെടുത്തല് തെളിയിക്കാനാവാതെ അന്വേഷണം അവസാനിപ്പിക്കാന് എസ്.ഐ.ടി ഒരുങ്ങുന്നു. ജൂലൈ 19ന് മുതിര്ന്ന ഐ.പി.എസ് ഉദ്യോഗസ്ഥന് ഡോ. പ്രണബ്കുമാര് മൊഹന്തിയുടെ നേതൃത്വത്തില് സംസ്ഥാന സര്ക്കാര് രൂപവത്കരിച്ച പ്രത്യേക അന്വേഷണ സംഘമാണ് (എസ്.ഐ.ടി) അന്വേഷണത്തില്നിന്ന് പിന്മാറുന്നത്.
ബലാത്സംഗത്തിന് വിധേയമായി കൊല്ലപ്പെട്ട നൂറിലേറെ പെണ്കുട്ടികളുടെയും യുവതികളുടെയും മൃതദേഹങ്ങള് താന് സംസ്കരിച്ചു എന്ന മാണ്ഡ്യ സ്വദേശി സി.എന്. ചിന്നയ്യയുടെ വെളിപ്പെടുത്തലിനെത്തുടര്ന്നാണ് സംഭവം വിവാദമായത്്. ചിന്നയ്യ ചൂണ്ടിക്കാട്ടിയ 18 ഓളം സ്ഥലങ്ങള് എസ്.ഐ.ടി പരിശോധിച്ചു. ഇവിടെ നിന്നു ലഭിച്ച മൃതദേഹ അവശിഷ്ടങ്ങളുടെ ഫോറന്സിക്, ഡി.എന്.എ വിശകലന നടപടികള് തുടരുകയാണ്.
നേത്രാവതി കുളിക്കടവിന് സമീപത്തുനിന്ന് കിട്ടിയ അവശിഷ്ടങ്ങള് പുരുഷന്മാരുടേതാണെന്നാണ് ലാബ് റിപ്പോര്ട്ടില് കണ്ടെത്തി. ബംഗ്ലഗുഡെയില് നിന്ന് കുഴിച്ചെടുത്ത അഞ്ച് തലയോട്ടികളുടെ ഫലങ്ങള് വന്നിട്ടില്ല. തെറ്റായ വിവരങ്ങള് നല്കിയ ചിന്നയ്യയെ പ്രതിയാക്കി കേസെടുത്ത എസ്.ഐ.ടി അയാള്ക്കുള്ള സുരക്ഷ പിന്വലിച്ചു. അറസ്റ്റിലായ ചിന്നയ്യ ഇപ്പോള് ശിവമൊഗ്ഗ ജയിലിലാണ്.
