തിരുവനന്തപുരം: പുതുവത്സരദിനത്തിൽ തലസ്ഥാനത്ത് നടന്ന മയക്കുമരുന്നുവേട്ടയിൽ പിടിയിലായത് ഡോക്ടറും മെഡിക്കൽ വിദ്യാർഥിനിയുമടങ്ങുന്ന സംഘം. എംഡിഎംഎയും ഹൈബ്രിഡ് കഞ്ചാവുമമായി ഡോക്ടറും ബിഡിഎസ് വിദ്യാർത്ഥിനിയും ഉൾപ്പെടെ ഏഴുപേരെയാണ് പൊലീസ് പിടികൂടിയത്. കഴക്കൂട്ടത്തിന് സമീപം കണിയാപുരത്തായിരുന്നു ലഹരി വേട്ട. കിഴക്കേകോട്ട അട്ടക്കുളങ്ങര സ്വദേശി ഡോ. വിഗ്നേഷ് ദത്തൻ, (34) കൊട്ടാരക്കര സ്വദേശിനിയും ബിഡിഎസ് വിദ്യാർത്ഥിനിയുമായ ഹലീന (27),നെടുമങ്ങാട് മണ്ണൂർക്കോണം സ്വദേശി അസിം (29), കൊല്ലം ആയൂർ സ്വദേശി അവിനാഷ് (29), തൊളിക്കോട് സ്വദേശി അജിത്ത് (30), പാലോട് സ്വദേശിനി അൻസിയ (37), കൊല്ലം ഇളമാട് സ്വദേശി ഹരീഷ് (29) എന്നിവരെയാണ് ഡാൻസാഫ് സംഘം പിടികൂടിയത്. അവിനാഷ് ഐടി ജീവനക്കാരനാണ്.
കണിയാപുരം തോപ്പിൽ ഭാഗത്തെ വാടകവീട്ടിൽനിന്നാണ് ഇവരെ പിടികൂടിയത്. അസിം, അജിത്ത്, അൻസിയ എന്നിവർ നേരത്തേയും നിരവധി ലഹരിക്കേസുകളിൽ പ്രതികളായവരാണ്. ബംഗളൂരുവിൽ നിന്ന് ലഹരിമരുന്ന് എത്തിച്ചത് ഇവർ മൂവരുമാണ്. പ്രൊഫഷണൽ വിദ്യാർത്ഥികൾക്കും ഡോക്ടർമാർക്കുമാണ് ഇവർ മയക്കുമരുന്ന് വിതരണം ചെയ്തിരുന്നത് എന്നാണ് പൊലീസ് നൽകുന്ന വിവരം.
