തിരുവനന്തപുരം: നാവികസേന ദിനാഘോഷങ്ങളില് പങ്കെടുക്കാനായി രാഷ്ട്രപതി ദ്രൗപദി മുർമു കേരളത്തിൽ. തിരുവനന്തപുരം വിമാനത്താവളത്തിലെത്തിയ രാഷ്ട്രപതിയെ ഗവർണർ രാജേന്ദ്ര ആർലേക്കറും മുഖ്യമന്ത്രി പിണറായി വിജയനും ചേർന്ന് സ്വീകരിച്ചു. ബുധനാഴ്ച വൈകുന്നേരം തിരുവനന്തപുരം ശംഖുമുഖത്താണ് നാവികസേനയുടെ ശക്തിപ്രകടനം. ചടങ്ങില് നാവികസേനാ മേധാവി അഡ്മിറല് ദിനേശ് കെ. ത്രിപാഠി പങ്കെടുക്കും. തിരുവനന്തപുരത്ത് ആദ്യമായാണ് നാവികസേനാ ദിനാഘോഷം.
19 പ്രധാന യുദ്ധക്കപ്പലുകള് അടക്കം 40 ലേറെ പടക്കപ്പലുകളും അന്തര്വാഹിനിയും 32 പോര്വിമാനങ്ങളും പങ്കെടുക്കും. ഐഎന്എസ് വിക്രാന്ത് ഉള്പ്പെടെയുള്ള ആത്യാന്താധുനിക യുദ്ധക്കപ്പലുകളും യുദ്ധവിമാനങ്ങളും ഹെലികോപ്ടറുകളും അഭ്യാസപ്രകടനത്തില് അണിനിരക്കുന്നുണ്ട്. ഐഎന്എസ് ഇംഫാല്, ഐഎന്എസ് കോല്ക്കത്ത, ഐഎന്എസ് ത്രിശൂല്, ഐഎന്എസ് തല്വാര് എന്നിവയുള്പ്പെട്ട പടക്കപ്പലുകളും തീരത്തെത്തിയിട്ടുണ്ട്.
9,000 പേര്ക്ക് പാസ് മുഖേന പ്രവേശനമുണ്ടാവും. തീരമേഖലയില് ഒരു ലക്ഷത്തോളം പേര്ക്ക് അഭ്യാസ പ്രകടനം വീക്ഷിക്കാം. വ്യാഴാഴ്ച രാവിലെ 9.45ന് ഡൽഹിക്ക് മടങ്ങും.
