മുന്‍ ഇന്ത്യന്‍ ക്രിക്കറ്റ് താരം റോജര്‍ ബിന്നിയെ (Roger Binny) പുതിയ ബിസിസിഐ (BCCI) പ്രസിഡന്റ് (president) ആയി തെരഞ്ഞെടുത്തു. സൗരവ് ഗാംഗുലിക്ക് (Sourav Ganguly) പിന്‍ഗാമിയായാണ് ബിന്നി എത്തുന്നത്. ചൊവ്വാഴ്ച നടന്ന വാര്‍ഷിക പൊതുയോഗത്തിലാണ് ബിന്നിയെ ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് (ബിസിസിഐ) പ്രസിഡന്റായി തെരഞ്ഞെടുത്തത്. 1983ല്‍ ലോകകപ്പ് നേടിയ ഇന്ത്യന്‍ ടീമിലെ പ്രധാന അംഗമായിരുന്ന ബിന്നി. ഗാംഗുലി ഇനി ബിസിസിഐ അധ്യക്ഷനാകില്ലെന്ന് അടുത്തിടെ റിപ്പോര്‍ട്ടുകള്‍ വന്നതിനാല്‍ ഈ തീരുമാനം കുറച്ചുനാളായി പ്രതീക്ഷിച്ചിരുന്നു. 67 കാരനായ ബിന്നി മാത്രമാണ് ബിസിസിഐ പ്രസിഡന്റ് സ്ഥാനത്തേക്ക് നാമനിര്‍ദ്ദേശ പത്രിക സമര്‍പ്പിച്ചത്.
ബിസിസിഐ പ്രസിഡന്റ് സ്ഥാനത്ത് നിന്ന് നീക്കിയതിന് ശേഷം ഗാംഗുലിക്ക് ഐപിഎല്‍ ചെയര്‍മാനായി വാഗ്ദാനം ലഭിച്ചെങ്കിലും അദ്ദേഹം അത് നിഷേധിച്ചു. ഗാംഗുലി തന്റെ ഹോം സ്റ്റേറ്റ് അസോസിയേഷനായ സിഎബിയിലേക്ക് രണ്ടാം തവണ പ്രസിഡന്റായി തിരിച്ചെത്തിയേക്കും.
ഗാംഗുലിയെ മാറ്റിയെങ്കിലും സെക്രട്ടറിയായി ജെയ് ഷാ തുടരും. ആശിഷ് ഷെലാര്‍ (ട്രഷറര്‍), രാജീവ് ശുക്ല (വൈസ് പ്രസിഡന്റ്), ദേവജിത് സൈകിയ (ജോയിന്‍ സെക്രട്ടറി) എന്നിവരും ഐകകണ്ഠേന തിരഞ്ഞെടുക്കപ്പെടുന്ന ബിസിസിഐ ഭാരവാഹികളില്‍ ഉള്‍പ്പെടുന്നു. സ്ഥാനമൊഴിയുന്ന ട്രഷറര്‍ അരുണ്‍ ധുമാല്‍ ഐപിഎല്‍ ചെയര്‍മാനാകും. ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡിന്റെ വാര്‍ഷിക പൊതുയോഗത്തിന് ബിന്നി, മുന്‍ ഐപിഎല്‍ ചെയര്‍മാന്‍ രാജീവ് ശുക്ല എന്നിവര്‍ക്കൊപ്പം ബിസിസിഐ പ്രസിഡന്റ് ഗാംഗുലി മുംബൈയിലെ താജ് ഹോട്ടലില്‍ എത്തിയിരുന്നു.
ബിസിസിഐ പ്രസിഡന്റ് സ്ഥാനത്ത് നിന്ന് നീക്കം ചെയ്തതിന് ശേഷം ഗാംഗുലി അടുത്തിടെ ഒരു പരിപാടിയില്‍ ഇതേക്കുറിച്ച് സംസാരിച്ചിരുന്നു. ഞാന്‍ അഞ്ച് വര്‍ഷമായി ബംഗാള്‍ ക്രിക്കറ്റ് അസോസിയേഷന്‍ പ്രസിഡന്റായിരുന്നു. വര്‍ഷങ്ങളായി ഞാന്‍ ബിസിസിഐയുടെ പ്രസിഡന്റുമായി. ഒരു അഡ്മിനിസ്ട്രേറ്റര്‍ എന്ന നിലയില്‍ നിങ്ങള്‍ ഒരുപാട് സംഭാവനകള്‍ നല്‍കുകയും ടീമിന് വേണ്ടി കാര്യങ്ങള്‍ മെച്ചപ്പെടുത്തുകയും വേണം. ഒരു അഡ്മിനിസ്ട്രേറ്റര്‍ എന്ന നിലയിലുള്ള എന്റെ സമയം ഞാന്‍ നന്നായി ആസ്വദിച്ചു. നിങ്ങള്‍ക്ക് എന്നേക്കും കളിക്കാന്‍ കഴിയില്ലെന്നും ഭരണത്തില്‍ എക്കാലവും തുടരാനാവില്ലെന്നും ഗാംഗുലി വ്യക്തമാക്കി.
കര്‍ണാടക സ്റ്റേറ്റ് ക്രിക്കറ്റ് അസോസിയേഷന്‍ പ്രസിഡന്റായിരുന്ന ബിന്നി, സംസ്ഥാന ബോഡിയില്‍ സ്ഥാനം ഒഴിയും. 1983ല്‍ ഇന്ത്യയുടെ ലോകകപ്പ് വിജയത്തിന്റെ ശില്പികളിലൊരാളായിരുന്നു ഈ മീഡിയം പേസര്‍. എട്ട് മത്സരങ്ങളില്‍ നിന്ന് അദ്ദേഹം 18 വിക്കറ്റ് വീഴ്ത്തി. മുമ്പ് സന്ദീപ് പാട്ടീല്‍ ചെയര്‍മാനായിരിക്കെ ബിന്നി സീനിയര്‍ സെലക്ഷന്‍ കമ്മിറ്റി അംഗമായി പ്രവര്‍ത്തിച്ചിട്ടുണ്ട്. മകന്‍ സ്റ്റുവര്‍ട്ട് ബിന്നി ഇന്ത്യയ്ക്കുവേണ്ടി കളിച്ചിട്ടുണ്ട്.
