ബഹ്റൈൻ കിരീടാവകാശിയും പ്രധാനമന്ത്രിയുമായ പ്രിൻസ് സല്മാൻ ബിൻ ഹമദ് അല് ഖലീഫയുടെ ഈജിപ്തിലേക്കുള്ള സന്ദർശനത്തിന്റെ ഭാഗമായി, കെയ്റോയില് ബഹ്റൈൻ-ഈജിപ്ത് ബിസിനസ് ഫോറം നടന്നു.ബഹ്റൈൻ സാമ്ബത്തിക വികസന ബോർഡ്, ബഹ്റൈൻ വ്യവസായ വാണിജ്യ മന്ത്രാലയം, ബഹ്റൈൻ ചേംബർ ഓഫ് കൊമേഴ്സ് ആൻഡ് ഇൻഡസ്ട്രി, ഈജിപ്തിലെ ജനറല് അതോറിറ്റി ഫോർ ഇൻവെസ്റ്റ്മെന്റ് ആൻഡ് ഫ്രീ സോണുകള് എന്നിവയുടെ സഹകരണത്തോടെയാണ് സംഘടിപ്പിച്ചത്. ബിസിനസ്, സാമ്ബത്തിക സഹകരണം ആഴത്തിലാക്കുന്നതിനും നിക്ഷേപം, വ്യാപാര വൈവിധ്യവല്ക്കരണം, സുസ്ഥിര വികസനം എന്നിവയ്ക്കായി പുതിയ വഴികള് കണ്ടെത്തുന്നതിനുമുള്ള ഇരുരാജ്യങ്ങളുടെയും പ്രതിബദ്ധത ഫോറം പ്രദർശിപ്പിച്ചു.
ഇരുരാജ്യങ്ങളിലെയും മുതിർന്ന സർക്കാർ ഉദ്യോഗസ്ഥരുടെ പങ്കാളിത്തത്തോടെയാണ് ഫോറം സംഘടിപ്പിച്ചത്. ബഹ്റൈൻ സുസ്ഥിര വികസന മന്ത്രിയും ബഹ്റൈൻ ഇഡിബി ചീഫ് എക്സിക്യൂട്ടീവുമായ നൂർ ബിൻത് അലി അല്-ഖുലൈഫ്, വ്യവസായ വാണിജ്യ മന്ത്രി അബ്ദുല്ല ബിൻ അദേല് ഫഖ്റോ, ഈജിപ്തിന്റെ നിക്ഷേപ, വിദേശ വ്യാപാര മന്ത്രി ഹസ്സൻ എല് ഖത്തീബ്, ഈജിപ്തിന്റെ ധനകാര്യ മന്ത്രി അഹമ്മദ് കൊജാക്ക്, ബിസിസിഐ ചെയർമാൻ സമീർ അബ്ദുള്ള നാസ്, ഈജിപ്തിലെ ജനറല് അതോറിറ്റി ഫോർ ഇൻവെസ്റ്റ്മെന്റ് ആൻഡ് ഫ്രീ സോണുകളുടെ സിഇഒ ഹൊസാം ഹെയ്ബ, സൂയസ് കനാല് ഇക്കണോമിക് സോണിന്റെ ജനറല് അതോറിറ്റി ചെയർമാൻ വാലിദ് ഗമാല് എല്-ദിൻ തുടങ്ങിയവർ ഫോറത്തില് പങ്കെടുത്തു
