തിരുവനന്തപുരം: പ്രവാസികൾ കൂട്ടമായി കേരളത്തിലേക്ക് മടങ്ങിവരുന്ന സാഹചര്യത്തിൽ, അവരുടെ പുനരധിവാസത്തിനും ഉപജീവന സുരക്ഷക്കും ബജറ്റിൽ തുക വകയിരുത്തി.
നോർക്ക റൂട്ട്സ് മുഖേന നടപ്പിലാക്കുന്ന സമഗ്ര പദ്ധതികളിലൂടെ മടങ്ങിവന്ന പ്രവാസികൾക്ക് സ്വയംതൊഴിൽ സംരംഭങ്ങൾ ആരംഭിക്കാൻ സഹായിക്കുകയും സുസ്ഥിരമായ ഉപജീവന മാർഗങ്ങൾ ഉറപ്പാക്കുകയും ചെയ്യുന്നതിനായി 65 കോടി രൂപ വകയിരുത്തി.
പ്രവാസികളുടെ സാമൂഹിക സുരക്ഷ ഉറപ്പാക്കുന്നതിനുള്ള ‘സാന്ത്വന’ പദ്ധതിക്കായി 35 കോടി രൂപ അനുവദിച്ചിട്ടുണ്ട്. ഇതോടൊപ്പം, കേരള നോൺ-റസിഡന്റ് കേരളൈറ്റ്സ് വെൽഫെയർ ബോർഡ് മുഖേന പ്രവാസികൾക്കും അവരുടെ കുടുംബങ്ങൾക്കും പെൻഷൻ, കുടുംബ പെൻഷൻ, മരണസഹായം, ചികിത്സാ സഹായം, വിവാഹ സഹായം, വിദ്യാഭ്യാസ സഹായം, പ്രസവ സഹായം എന്നിവ നൽകുന്നതിനായി ബോർഡിന്റെ പ്രവർത്തനങ്ങൾക്ക് 18 കോടി രൂപ അനുവദിച്ചു.
നോർക്ക ക്ഷേമ ബോർഡ് വഴി നടപ്പിലാക്കുന്ന പ്രവാസി ഡിവിഡന്റ് സ്കീം പദ്ധതിക്കായി 6.50 കോടി രൂപ നീക്കിവച്ചിട്ടുണ്ട്.
അതേസമയം, ലോക കേരള സഭയുടെ സംഘാടനം, ലോക കേരളം ഓൺലൈൻ, ലോക കേരള കേന്ദ്രം, ലോക മലയാള കേന്ദ്രം എന്നിവ ഉൾപ്പെടെയുള്ള അനുബന്ധ പ്രവർത്തനങ്ങൾ നടപ്പിലാക്കുന്നതിനായി 7.30 കോടി രൂപ കൂടി ബജറ്റിൽ ഉൾപ്പെടുത്തി.
പ്രവാസി സമൂഹത്തിന്റെ തിരിച്ചുവരവ് കേരളത്തിന്റെ വികസനത്തിന് ശക്തിയാക്കുകയാണ് ലക്ഷ്യമെന്ന് സർക്കാർ വ്യക്തമാക്കി.
