തൃശ്ശൂർ (പന്നിത്തടം): വീട്ടുപടിയ്ക്കൽ നിർത്തിയിട്ടിരുന്ന ഇലക്ട്രിക് ഓട്ടോറിക്ഷ കിണറ്റിലേക്ക് മറിഞ്ഞുണ്ടായ വൻ അപകടത്തിൽ നിന്നും നാല് വയസ്സുകാരി അത്ഭുതകരമായി രക്ഷപ്പെട്ടു. കിടങ്ങൂർ സ്വദേശികളായ ചിറ്റിലപ്പിള്ളി വിന്നി-സീമ ദമ്പതികളുടെ മകൾ എൽസിയാണ് നിസ്സാര പരിക്കുകളോടെ ജീവിതത്തിലേക്ക് തിരിച്ചെത്തിയത്. കുട്ടിയുടെ അമ്മൂമ്മയുടെ പിതാവായ ഔസി ഓടിക്കുന്ന ഇലക്ട്രിക് ഓട്ടോറിക്ഷയിലാണ് അപകടമുണ്ടായത്. ഉച്ചയ്ക്ക് രണ്ടരയോടെ അദ്ദേഹം ഊണ് കഴിക്കാനായി വണ്ടി വീട്ടുമുറ്റത്ത് നിർത്തിയിട്ടിരിക്കുകയായിരുന്നു. ഈ സമയം ഓട്ടോയ്ക്കുള്ളിൽ കയറി കളിക്കുകയായിരുന്ന എൽസി, അബദ്ധത്തിൽ വാഹനം സ്റ്റാർട്ട് ചെയ്യുകയായിരുന്നു. മുന്നോട്ട് നീങ്ങിയ ഓട്ടോറിക്ഷ നിയന്ത്രണം വിട്ട് മുറ്റത്തെ കിണറ്റിലേക്ക് തലകീഴായി മറിഞ്ഞു. വലിയൊരു ദുരന്തം ഒഴിവായത് കുട്ടിയുടെ വസ്ത്രം ഓട്ടോയുടെ ഡോറിൽ കുടുങ്ങിയതുകൊണ്ട് മാത്രമാണ്. ഓട്ടോയുടെ മുൻഭാഗം കിണറ്റിലെ വെള്ളത്തിൽ മുങ്ങിയെങ്കിലും, കുട്ടി വെള്ളത്തിലേക്ക് വീഴാതെ ഡോറിൽ തൂങ്ങിക്കിടക്കുകയായിരുന്നു.
ഈ സമയം സമീപത്ത് വളർത്തുമൃഗങ്ങൾക്ക് പുല്ല് പറിച്ചുകൊണ്ടിരുന്ന മോഹനൻ എന്നയാൾ ശബ്ദം കേട്ട് ഓടിയെത്തുകയും, ഒട്ടും സമയം കളയാതെ കിണറ്റിലിറങ്ങി കുട്ടിയെ സുരക്ഷിതമായി കരയ്ക്കടുപ്പിക്കുകയുമായിരുന്നു. ഉടൻ തന്നെ നാട്ടുകാർ ചേർന്ന് കുട്ടിയെ കുന്നംകുളത്തെ സ്വകാര്യ ആശുപത്രിയിൽ എത്തിച്ച് പ്രാഥമിക ശുശ്രൂഷകൾ നൽകി. കുട്ടിക്ക് പരിക്കുകളൊന്നും ഗുരുതരമല്ലെന്ന് ഡോക്ടർമാർ അറിയിച്ചു. വിവരമറിഞ്ഞ് സ്ഥലത്തെത്തിയ കുന്നംകുളം അഗ്നിരക്ഷാസേന ഏറെ പ്രയത്നിച്ചാണ് കിണറ്റിൽ കിടന്ന ഇലക്ട്രിക് ഓട്ടോറിക്ഷ പുറത്തെടുത്തത്. കുട്ടിയുടെ മാതാപിതാക്കൾ ബെംഗളൂരുവിലായതിനാൽ നിലവിൽ അമ്മയുടെ മാതാപിതാക്കളുടെ സംരക്ഷണയിലാണ് എൽസി കഴിയുന്നത്.
