ഇന്ത്യയുടെ 79-ാമത് സ്വാതന്ത്ര്യദിനത്തിൽ, ബഹ്റൈനിലെ മോട്ടോർസൈക്കിൾ പ്രേമികളുടെ സംഘമായ പ്ലെഷർ റൈഡേഴ്സ് എന്ന മോട്ടോർസൈക്കിൾ റൈഡിങ് ഗ്രൂപ്പിലെ അംഗങ്ങൾ ഇന്ത്യൻ ത്രിവർണ്ണ പതാക പ്രദർശിപ്പിച്ചുകൊണ്ട് പ്രതീകാത്മക റൈഡ് നടത്തി. ദേശസ്നേഹികളായ റൈഡർമാർ പ്രവാസികളുടെ ഐക്യവും അഭിമാനവും അടിവരയിട്ടു വഴിയിലുടനീളം ആളുകളുടെ ശ്രദ്ധ പിടിച്ചുപറ്റി, അതിർത്തികൾക്കപ്പുറം ഇന്ത്യയുടെ ആത്മാവിനെ ആഘോഷിച്ചു.
അതിരാവിലെ അധാരി പാർക്ക് പ്രദേശത്ത് നിന്ന് പ്ലെഷർ റൈഡേഴ്സ് തങ്ങളുടെ റൈഡ് ഫ്ലാഗ് ഓഫ് ചെയ്യുകയും ഉയർന്നു പറക്കുന്ന ഇന്ത്യൻ ദേശീയ പതാകയുമായി 100 കിലോമീറ്ററിലധികം ദൂരം സഞ്ചരിക്കുകയും ബഹ്റൈനിലെ നിരവധി പ്രധാനപ്പെട്ട സ്ഥലങ്ങൾ സന്ദർശിക്കുകയും ചെയ്തു.
ഇന്ത്യൻ എംബസിയിൽ യാത്ര അവസാനിപ്പിച്ച സംഘം, അംബാസഡർ വിനോദ് കെ ജേക്കബ് അവർകളുടെ നേതൃത്വത്തിൽ നടത്തിയ രാഷ്ട്രപിതാവിനെ ആദരിച്ചുകൊണ്ട് പുഷ്പാർച്ചനയിലും പതാക ഉയർത്തൽ ചടങ്ങിലും പങ്കെടുത്തു.
