തിരുവനന്തപുരം: കാസര്കോട് ജില്ലയിലെ എന്ഡോസള്ഫാന് ദുരിതബാധിതരെ കണ്ടെത്തുന്നതിനായി 2017 ല് നടത്തിയ ആദ്യഘട്ട മെഡിക്കല് പരിശോധനയുടെയും ഫീല്ഡ് തല പരിശോധനയുടെയും അടിസ്ഥാനത്തില് പ്രാഥമിക ലിസ്റ്റില് ഉള്പ്പെട്ടതും പിന്നീട് അന്തിമ ലിസ്റ്റില് നിന്ന് ഒഴിവാക്കപ്പെട്ടതുമായ 1031 പേരില് അര്ഹതപ്പെട്ടവര്ക്ക് ധനസഹായം നല്കാന് മന്ത്രിസഭാ യോഗത്തില് തീരുമാനം. ഇതിനുള്ള അനുമതി കളക്ടര്ക്ക് നല്കി.കേരള സംസ്ഥാന പട്ടികജാതി, പട്ടികവര്ഗ്ഗ വികസന കോര്പ്പറേഷന് ജീവനക്കാര്ക്ക് പതിനൊന്നാമത് ശമ്പള പരിഷ്ക്കരണം നടപ്പാക്കാനും തീരുമാനിച്ചു. എല്.ബി.എസ് സെന്റര് ഫോര് സയന്സ് ആന്റ് ടെക്നോളജിയിലെയും കീഴിലുള്ള സ്ഥാപനങ്ങളിലെയും ജീവനക്കാര്ക്ക് വ്യവസ്ഥകളോടെ പതിനൊന്നാം ശമ്പള പരിഷ്കരണം നടപ്പിലാക്കും.അതിദാരിദ്ര്യ നിര്മ്മാര്ജന പദ്ധതി പ്രകാരമുള്ള ഭൂരഹിത ഭവനരഹിത പട്ടികയില്പ്പെട്ട ആലപ്പുഴ ജില്ലയിലെ 50 അതിദരിദ്ര കുടുംബങ്ങള്ക്ക് ഫ്ലാറ്റ് അനുവദിക്കും. ‘പുനര്ഗേഹം’ പദ്ധതിയുടെ ഭാഗമായി ആലപ്പുഴ ജില്ലയിലെ പുറക്കാട് മണ്ണുംപുറത്ത് നിര്മ്മാണം പൂര്ത്തീകരിച്ചുവരുന്ന ഫിഷറീസ് വകുപ്പിന്റെ ഫ്ലാറ്റ് സമുച്ചയത്തിലെ 50 ഫ്ലാറ്റുകളാണ് നല്കുക. പുനര്ഗേഹം പദ്ധതി പ്രകാരം നിര്മ്മിച്ചതില് അധികമുള്ള 50 ഫ്ലാറ്റുകള് നല്കാനാണ് തീരുമാനം.
