പത്തനംതിട്ട: ഡിജിറ്റൽ അറസ്റ്റ് തട്ടിപ്പിൽ വൃദ്ധദമ്പതിമാരുടെ 1.4 കോടി രൂപ നഷ്ടപ്പെട്ടു. മല്ലപ്പള്ളി സ്വദേശികളായ വൃദ്ധ ദമ്പതിമാർക്കാണ് പണം നഷ്ടമായത്. ഇക്കഴിഞ്ഞദിവസമാണ് സംഭവം. മുംബൈ ക്രൈംബ്രാഞ്ചിൽ നിന്നാണെന്ന് പരിചയപ്പെടുത്തി ഒരു ഫോൺകോൾ വന്നതാണ് സംഭവങ്ങളുടെ തുടക്കം. ദമ്പതിമാരിൽ ഭാര്യയുടെ ഫോൺ നമ്പറിലേക്കാണ് കോൾവന്നത്. കുട്ടികളുമായി ബന്ധപ്പെട്ട ഒരു കുറ്റകൃത്യത്തിൽ ഇവരുടെ മൊബൈൽ നമ്പർ ഉൾപ്പെട്ടിട്ടുണ്ടെന്നാണ് മുംബൈ ക്രൈംബ്രാഞ്ച് ഉദ്യോഗസ്ഥനെന്ന് പരിചയപ്പെടുത്തിയ തട്ടിപ്പുകാരൻ പറഞ്ഞത്.
ഇതിന്റെ ഭാഗമായി അക്കൗണ്ടിലെ പണം പരിശോധിക്കണമെന്നും നിർദേശിക്കുന്ന അക്കൗണ്ടിലേക്ക് ഇത് കൈമാറണമെന്നും ആവശ്യപ്പെട്ടു. റിസർവ് ബാങ്കിന്റെ പരിശോധനയ്ക്കായാണ് ഇത് കൈമാറുന്നതെന്നും പരിശോധന പൂർത്തിയായാൽ പണം തിരികെനൽകുമെന്നും വിശ്വസിപ്പിച്ചു. ഇതോടെ വയോധിക തന്റെ ബാങ്ക് അക്കൗണ്ടിലായിരുന്ന 90 ലക്ഷം രൂപ കൈമാറി. ഇത്തരത്തിൽ ഭർത്താവിന്റെ അക്കൗണ്ടിലെ പണവും സമാനരീതിയിൽ നൽകി. ആകെ 1.40 കോടി രൂപയാണ് ഇരുവരും കൈമാറിയത്. എന്നാൽ, പണം തിരികെ ലഭിച്ചില്ല. ഇതോടെയാണ് സംഭവം തട്ടിപ്പാണെന്ന് ഇവർക്ക് ബോധ്യപ്പെട്ടത്.
