മുന് പ്രധാനമന്ത്രി ഡോ.മന്മോഹന് സിങ് ഇനി ഓര്മ. സംസ്കാരം യമുന തീരത്തെ നിഗംബോധ് ഘട്ടില് പൂര്ണ ഔദ്യോഗിക ബഹുമതികളോടെ നടന്നു. രാഷ്ട്രപതി ദൗപതി മുര്മു, പ്രധാനമന്ത്രി നരേന്ദ്രമോദി, പ്രതിരോധമന്ത്രി രാജ് നാഥ് സിംഗ്, ആഭ്യന്തരമന്ത്രി അമിത് ഷാ ഉള്പ്പെടെയുള്ളവര് നിഗംബോധ് ഘട്ടിലെത്തി അന്തിമോപചാരം അര്പ്പിച്ചു. എഐസിസി ആസ്ഥാനത്ത് പൊതുദര്ശനത്തിന് വെച്ച മൃതദേഹം വിലാപയാത്രയായാണ് നിഗംബോധ് ഘട്ടിലെത്തിച്ചത്. സോണിയാ ഗാന്ധി ,രാഹുല് ഗാന്ധി ഉള്പ്പെടെയുള്ളവര് വിലാപയാത്രയെ അനുഗമിച്ചു. മന്മോഹന് സിംഗ് അമര് രഹേ മുദ്രാവാക്യം മുഴക്കി വന് ജനക്കൂട്ടം അന്ത്യയാത്രയില് പങ്കാളികളായി.രാജ്യം ഏഴ് ദിവസത്തെ ദുഃഖാചരണത്തിലാണ്. വെള്ളിയാഴ്ച രാവിലെ പ്രധാനമന്ത്രി നരേന്ദ്രമോദിയുടെ അധ്യക്ഷതയില് ചേര്ന്ന കേന്ദ്രമന്ത്രിസഭായോഗം അനുശോചനപ്രമേയം അംഗീകരിച്ചു. ജനുവരി ഒന്നുവരെ ദേശീയപതാക പകുതി താഴ്ത്തിക്കെട്ടും. വിദേശത്തെ ഇന്ത്യന് ദൗത്യസംഘങ്ങളുടെ ആസ്ഥാനങ്ങളിലും ഹൈക്കമ്മിഷനുകളിലും ദേശീയപതാക പകുതി താഴ്ത്തിക്കെട്ടും
