ജ്വല്ലറി അറേബ്യയുടെ 33-ാമത് പതിപ്പും സെന്റ് അറേബ്യയുടെ മൂന്നാമത് പതിപ്പും നവംബര് 25 മുതല് 29 വരെ എക്സിബിഷന് വേള്ഡ് ബഹ്റൈനില് നടക്കും.ബഹ്റൈന് കിരീടാവകാശിയും പ്രധാനമന്ത്രിയുമായ പ്രിന്സ് സല്മാന് ബിന് ഹമദ് അല് ഖലീഫയുടെ രക്ഷാകര്തൃത്വത്തില്,ഇന്ഫോര്മ ബഹ്റൈന് സംഘടിപ്പിക്കുന്ന ജ്വല്ലറി അറേബ്യയും സെന്റ് അറേബ്യയും ഈ വര്ഷം പുതിയതും നൂതനവുമായ ഒരു ഫോര്മാറ്റില് തിരിച്ചെത്തുമെന്ന് സംഘാടകര് അറിയിച്ചു.ആറ് ഹാളുകളിലായി അഞ്ച് ദിവസങ്ങളിലായി നടക്കുന്ന രണ്ട് പരിപാടികളിലും ഇന്ത്യയില്നിന്നടക്കം 700-ലധികം അന്താരാഷ്ട്ര, പ്രാദേശിക പ്രദര്ശകര് ഒത്തുകൂടുന്നു.ജ്വല്ലറി അറേബ്യയിലെ വിശിഷ്ട പ്രദര്ശകരില് അല് സൈന് ജ്വല്ലറി, കൂഹെജി ജ്വല്ലറി, മട്ടാര് ജ്വല്ലേഴ്സ്, മലബാര് ഗോള്ഡ് ആന്ഡ് ഡയമണ്ട്സ്, എന്നിവയ്ക്ക് പുറമേ ‘എപിഎം മൊണാക്കോ’ ബ്രാന്ഡ് അവതരിപ്പിക്കുന്ന ബഹ്റൈന് ജ്വല്ലറി സെന്റര് ഉള്പ്പെടുന്നു. അത്യാബ് അല്മര്ഷൂദ്, ക്വിസ്സ പെര്ഫ്യൂംസ്, അത്യാബ് അല് ഷെയ്ഖ്, അറേബ്യന് ഔദ്, ജുനൈദ് പെര്ഫ്യൂംസ് തുടങ്ങിയ പ്രമുഖ പെര്ഫ്യൂം ഷോപ്പുകള്ക്ക് സെന്റ് അറേബ്യ ആതിഥേയത്വം വഹിക്കും. പുരാതന ഗ്രീക്ക് കരകൗശല വസ്തുക്കള് പ്രദര്ശിപ്പിക്കുന്ന ഒരു ഗ്രീക്ക് പവലിയന്, ഓണ്-സൈറ്റ് ആഭരണ നിര്മ്മാണവും ഇഷ്ടാനുസൃതമാക്കല് സേവനങ്ങളും വാഗ്ദാനം ചെയ്യുന്ന ജ്വല്ലറി അറേബ്യ വര്ക്ക്ഷോപ്പ് എന്നിവയും എക്സിബിഷനിൽ ഉണ്ടാകും.ഔദ്യോഗിക ലിങ്ക് വഴി സന്ദര്ശകര്ക്ക് സൗജന്യമായി രജിസ്റ്റര് ചെയ്യാം.നവംബര് 25 മുതല് നവംബര് 27 വരെ ഉച്ചകഴിഞ്ഞ് മൂന്ന് മുതല് രാത്രി 10 വരെയും നവംബര് 28 ഉച്ചയ്ക്ക് ഒന്ന് മുതല് രാത്രി 10 വരെയും ആണ് പ്രദർശനം. അവസാന ദിവസമായ നവംബര് 29-ന് ഉച്ചകഴിഞ്ഞ് മൂന്ന് മുതല് രാത്രി 10 വരെയും പ്രവേശനം അനുവദിക്കും.
