വാഷിങ്ടൺ: ന്യൂയോർക്ക് നഗരത്തിന്റെ മേയർ സ്ഥാനത്തേക്ക് ഡെമോക്രാറ്റിക് സ്ഥാനാർഥി സൊഹ്റാൻ മംദാനി വിജയിച്ചതിന് തൊട്ടുപിന്നാലെ സാമൂഹികമാധ്യമമായ എക്സിൽ കുറിപ്പ് പങ്കുവെച്ച് വൈറ്റ്ഹൗസ്. ‘ട്രംപ് ആണ് നിങ്ങളുടെ പ്രസിഡന്റ്’ എന്ന കുറിപ്പാണ് വൈറ്റ്ഹൗസ് പങ്കുവച്ചത്. മംദാനിയുടെ വിജയം ട്രംപിനേറ്റ കനത്ത തിരിച്ചടിയായി വിലയിരുത്തപ്പോഴാണ് ഈ കുറിപ്പ്.
റിപ്പബ്ലിക്കൻ സ്ഥാനാർഥിയായ കർടിസ് സ്ലിവ, സ്വതന്ത്രസ്ഥാനാർഥി ആൻഡ്രൂ ക്വോമോ എന്നിവരായിരുന്നു മംദാനിയുടെ എതിരാളികൾ. വിജയത്തിലൂടെ ന്യൂയോർക്ക് നഗരത്തിന്റെ മേയർസ്ഥാനത്തെത്തുന്ന ആദ്യ മുസ്ലിം മേയർ എന്ന നേട്ടംകൂടി മംദാനിക്ക് സ്വന്തമാകും. കമ്യൂണിസ്റ്റായ മംദാനി മേയറായി തിരഞ്ഞെടുക്കപ്പെടുന്നപക്ഷം ന്യൂയോർക്കിന് നാമമാത്രമായ ഫെഡറൽ സഹായധനമേ നൽകൂവെന്ന് നേരത്തെ ഡൊണാൾഡ് ട്രംപ് തന്റെ സാമൂഹികമാധ്യമമായ എക്സിലൂടെ മുന്നറിയിപ്പും നൽകിയിരുന്നു.
