ന്യൂഡൽഹി: ഉത്തർപ്രദേശിലെ ഗൊരഖ്പൂരിൽ ബിആർഡി മെഡിക്കൽ കോളേജിലെ മലയാളി ഡോക്ടർ ദുരൂഹസാഹചര്യത്തിൽ മരിച്ചനിലയിൽ. തിരുവനന്തപുരം പാറശാല പാലൂർകോണം സ്വദേശി സ്വദേശി അഭിഷോ ഡേവിഡ് (32) ആണ് മരിച്ചത്. ഹോസ്റ്റൽ മുറിക്കുള്ളിലാണ് മൃതദേഹം കണ്ടെത്തിയത്. വെള്ളിയാഴ്ചയായിരുന്നു സംഭവം. മൂന്നാംവർഷ പിജി വിദ്യാർഥിയും അനസ്തേഷ്യ ഡിപ്പാർട്മെന്റിലെ ജൂനിയർ ഡോക്ടറുമായിരുന്നു. വെള്ളിയാഴ്ച രാവിലെ ജീവനക്കാർ നോക്കിയപ്പോഴാണ് മുറിക്കുള്ളിൽ അഭിഷോയെ മരിച്ചനിലയിൽ കണ്ടെത്തിയത്.മുറി അകത്തുനിന്നും പൂട്ടിയ നിലയിലായിരുന്നെന്ന് മൊഴി. ആത്മഹത്യാക്കുറിപ്പ് കണ്ടെത്തിയിട്ടില്ലെന്ന് പൊലീസ് പറഞ്ഞു. അമിതമായി മരുന്ന് ഉള്ളിൽചെന്നതായി കരുതുന്നു. കുടുംബപരമായി യാതൊരു പ്രശ്നങ്ങളും ഉണ്ടായിരുന്നില്ലെന്ന് ബന്ധുക്കൾ പറഞ്ഞു. ഇന്നലെ രാത്രി പന്ത്രണ്ടുമണിയോടെയായിരുന്നു വീട്ടുകാർക്ക് വിവരം ലഭിച്ചത്. തുടർന്ന് ബന്ധുക്കൾ അവിടേക്ക് പുറപ്പെടുകയായിരുന്നു. അഭിഷോയുടെ ഭാര്യ ഗർഭിണിയാണ്. മൂന്നുവർഷം മുമ്പാണ് അഭിഷോ ഗോരഖ്പൂരിലെത്തിയത്.
