ചെന്നൈ: മുല്ലപ്പെരിയാർ അണക്കെട്ടിന്റെ ശിൽപ്പിയായ ബ്രിട്ടിഷ് എൻജിനീയർ കേണൽ പെന്നി ക്വിക്കിന്റെ കുടുംബത്തെ തമിഴ്നാട് മുഖ്യമന്ത്രി എം.കെ.സ്റ്റാലിൻ കണ്ടു. വിദേശപര്യടനത്തിന്റെ ഭാഗമായി ലണ്ടനിലെത്തിയപ്പോഴാണ് പെന്നി ക്വിക്കിന്റെ കുടുംബം സ്റ്റാലിനെ കാണാനെത്തിയത്. പെന്നി ക്വിക്കിന്റെ പ്രതിമ അദ്ദേഹത്തിന്റെ ജന്മഗ്രാമമായ യുകെയിലെ കിംബർലിയിൽ സ്ഥാപിച്ചതിന് തമിഴ്നാട് സർക്കാരിനോട് കുടുംബം നന്ദി പറഞ്ഞതായി സ്റ്റാലിൻ അറിയിച്ചു. കുടുംബം നേരിട്ട് ഉന്നയിച്ച ആവശ്യങ്ങൾ നടപ്പാക്കുമെന്നും സ്റ്റാലിൻ പറഞ്ഞു. 2022ലാണ് തമിഴ്നാട് സർക്കാർ മുൻകൈയെടുത്ത് പ്രതിമ അനാഛാദനം ചെയ്തത്. നിലവിൽ തേനി ജില്ലയിലെ ലോവർക്യാംപിൽ പെന്നിക്വിക്കിന് സ്മാരകമുണ്ട്. തേനിയിലെ ബസ് ടെർമിനലിനും പെന്നി ക്വിക്കിന്റെ പേരാണ്.
