തിരുവനന്തപുരം: മരണത്തിന് കീഴടങ്ങിയപ്പോഴും അഞ്ചുപേർക്ക് ജങ്ീപകർന്ന് തിരുവനന്തപുരം സ്വദേശി കൃഷ്ണലാൽ (45) മാതൃകയായി. മസ്തിഷ്ക മരണം സംഭവിച്ച കൃഷ്ണലാലിൻറെ അഞ്ച് അവയവങ്ങളാണ് ബന്ധുക്കളുടെ സമ്മതത്തോടെ ദാനം ചെയ്തത്. കൃഷ്ണലാലിൻറെ ഹൃദയം, കരൾ, രണ്ട് വൃക്കകൾ, നേത്രപടലം എന്നിവയാണ് ദാനം ചെയ്തത്. തിരുവനന്തപുരം മെഡിക്കൽ കോളേജ് ആശുപത്രിയിൽ വെച്ചാണ് അവയവങ്ങൾ നീക്കം ചെയ്യുന്നതിനുള്ള ശസ്ത്രക്രിയകൾ നടന്നത്. കഴിഞ്ഞ ദിവസമുണ്ടായ വാഹനാപകടത്തെത്തുടർന്നാണ് കൃഷ്ണലാലിനെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചത്. വിദഗ്ധ ചികിത്സ നൽകിയെങ്കിലും മസ്തിഷ്ക മരണം സംഭവിക്കുകയായിരുന്നു.
തുടർന്ന് ആശുപത്രി അധികൃതർ അവയവദാനത്തിൻറെ സാധ്യതയെക്കുറിച്ച് ബന്ധുക്കളോട് സംസാരിക്കുകയും അവർ സന്നദ്ധത അറിയിക്കുകയുമായിരുന്നു. ദാനം ചെയ്ത ഹൃദയം എറണാകുളത്തെ സ്വകാര്യ ആശുപത്രിയിൽ ചികിത്സയിലുള്ള രോഗിക്കാണ് നൽകിയത്. ഇതിനായി പോലീസ് സഹായത്തോടെ ‘ഗ്രീൻ ചാനൽ’ ഒരുക്കി മിനിറ്റുകൾക്കുള്ളിൽ ഹൃദയം എറണാകുളത്ത് എത്തിച്ചു. മറ്റ് അവയവങ്ങൾ തിരുവനന്തപുരം മെഡിക്കൽ കോളേജിലും മറ്റ് സർക്കാർ ആശുപത്രികളിലുമായി ചികിത്സയിലുള്ളവർക്ക് നൽകി.
