കിരീടാവകാശിയും പ്രധാനമന്ത്രിയുമായ ഹിസ് റോയൽ ഹൈനസ് പ്രിൻസ് സൽമാൻ ബിൻ ഹമദ് അൽ ഖലീഫ ഇന്ന് ഗുദൈബിയ കൊട്ടാരത്തിൽ നടന്ന പ്രതിവാര മന്ത്രിസഭാ യോഗത്തിൽ അധ്യക്ഷത വഹിച്ചു.രാജകീയ നിർദ്ദേശങ്ങൾ നടപ്പിലാക്കുന്നതിലൂടെ,രാജ്യത്തെ എല്ലാ സർക്കാർ സ്ഥാപനങ്ങളും അവരുടെ ഉത്തരവാദിത്തങ്ങൾ നിറവേറ്റുന്നത് തുടരുമെന്ന് മന്ത്രിസഭ ചൂണ്ടിക്കാട്ടി.ബഹ്റൈനും കുവൈറ്റിനും എതിരായ ഇറാൻ നടത്തിയ ആക്രമണത്തെ മന്ത്രിസഭാ യോഗം അപലപിച്ചു. ശത്രുത ഉടൻ അവസാനിപ്പിക്കാനും, ഹോർമുസ് കടലിടുക്ക് പൂർണ്ണമായും നിയന്ത്രണങ്ങളില്ലാതെയും വീണ്ടും തുറക്കാനും, അന്താരാഷ്ട്ര നിയമപ്രകാരം സമുദ്ര സഞ്ചാര സ്വാതന്ത്ര്യത്തെ മാനിക്കാനും, സുരക്ഷാ കൗൺസിൽ പ്രമേയങ്ങൾ പാലിക്കാനും ഇറാനോട് മന്ത്രിസഭ ആവശ്യപ്പെട്ടു.
സംഘർഷം രൂക്ഷമാകുന്നത് തടയാനും, സാധാരണക്കാരെയും നിർണായക സൗകര്യങ്ങളെയും സംരക്ഷിക്കാനും, പ്രാദേശിക, അന്തർദേശീയ സമാധാനവും സുരക്ഷയും നിലനിർത്താനും ലക്ഷ്യമിട്ടുള്ള ശ്രമങ്ങൾക്ക് മന്ത്രി സഭയുടെ പിന്തുണയും വ്യക്തമാക്കി.ആക്രമണങ്ങളെ ഫലപ്രദമായി നേരിടുന്നതിൽ ബഹ്റൈൻ പ്രതിരോധ സേന, നാഷണൽ ഗാർഡ്, ആഭ്യന്തര മന്ത്രാലയം, സൈന്യം, സുരക്ഷാ, സിവിൽ അധികാരികൾ എന്നിവരെ മന്ത്രിസഭ അഭിനന്ദിച്ചു.കൂടാതെ 2025–2026 അധ്യയന വർഷത്തിലെ രാജ്യത്തെ എല്ലാ വിദ്യാഭ്യാസ ഘട്ടങ്ങളിലുമുള്ള വിദ്യാർത്ഥികളെ മന്ത്രിസഭ അഭിനന്ദിക്കുകയും, കുട്ടികളുടെ വിദ്യാഭ്യാസ യാത്രയെ പിന്തുണയ്ക്കുന്നതിൽ മാതാപിതാക്കളുടെ പങ്കിനെ പ്രശംസിക്കുകയും ചെയ്തു
