ഇൻഡോ- ബഹ്റൈൻ സാംസ്കാരിക പ്രവർത്തനങ്ങളുടെ ചരിത്രത്തിൽ ശ്രദ്ധേയമായ ഇടപെടലുകൾ നടത്തിക്കൊണ്ടിരിക്കുന്ന ബി കെ എസ് ഇൻഡോ- ബഹ്റൈൻ ഡാൻസ് ആൻഡ് മ്യൂസിക് ഫെസ്റ്റിവൽ നാലാമത് എഡിഷൻ മെയ് രണ്ടിന് ആരംഭിക്കുമെന്ന് ബഹ്റൈൻ കേരളിയ സമാജം പ്രസിഡണ്ട് പി വി രാധാകൃഷ്ണപിള്ള അറിയിച്ചു.ബഹ്റൈനിലെ ഇന്ത്യൻ എംബസിയുടെയും ബഹ്റൈൻ കൾച്ചറൽ അതോറിറ്റിയുടെയും (BACA) ഏഷ്യയിലെ ഏറ്റവും വലിയ കലാസാംസ്കാരിക പ്രസ്ഥാനമായ സൂര്യയുടെയും സഹകരണത്തോടെ സംഘടിപ്പിക്കുന്ന ഡാൻസ് ആൻഡ് മ്യൂസിക് ഫെസ്റ്റിവലിൽ ഇത്തവണയും ഇന്ത്യയിലെയും ബഹ്റൈനിലെയും പ്രമുഖ കലാകാരന്മാരാണ് ഫെസ്റ്റിവലിനായി എത്തിച്ചേരുന്നത്.ഇൻഡോ- ബഹ്റൈൻ ഫെസ്റ്റിവൽ ഉദ്ഘാടന ദിവസമായ മെയ് 2 വെള്ളിയാഴ്ച വൈകുന്നേരം ഏഴുമണിക്ക് ബഹ്റൈനിലെ ഇന്ത്യൻ അംബാസഡർ വിനോദ് ജേക്കബ്, ഡോ. ജോൺ ബ്രിട്ടാസ് എം പി, ബഹറൈൻ- ഇന്ത്യ സൊസൈറ്റി ചെയർമാൻ അബ്ദുൽ റഹ്മാൻ ജുമാ, ഫൗലത് സി.ഈ.ഒ. ദിലീപ് ജോർജ് തുടങ്ങിയവർ മുഖ്യതിഥികളായി പങ്കെടുക്കും.
മെയ് രണ്ടിന് ആരംഭിക്കുന്ന ഫെസ്റ്റിവലിൽ കർണാട്ടിക്ക് വോക്കൽ സംഗീതത്തിൽ പ്രമുഖനായ സന്ദീപ് നാരായണൻ, രണ്ടാം ദിവസമായ മെയ് മൂന്നാം തിയ്യതി പ്രശസ്ത മണ്ഡോലിൻ കലാകാരൻ യു.രാജേഷ് എന്നിവർ കലാപരിപാടികൾ അവതരിപ്പിക്കും.ഇന്ത്യയിലെ പ്രമുഖ നർത്തകിമാരായ മേതിൽ ദേവിക, ആശ ശരത്, ഉത്തര ശരത്, ബഹ്റൈനിലെ യുവ ഗായകനും മ്യൂസിഷ്യനുമായ മുഹമ്മദ് അസീരി, മലയാളത്തിലെ പ്രശസ്ത സിനിമ പിന്നണി ഗായികയും ഗായത്രി വീണാവാദകയുമായ വൈക്കം വിജയലക്ഷ്മി, കർണാട്ടിക് വോക്കൽ മ്യൂസിക് രംഗത്തെ പ്രഗൽഭനായ കുന്നകുടി എം. ബാലമുരളീകൃഷ്ണ തുടങ്ങിയവരാണ് വിവിധ ദിവസങ്ങളിലായി പങ്കെടുക്കുന്നത്. പ്രമുഖ കലാകാരനും സംഘാടകനുമായ സൂര്യ കൃഷ്ണമൂർത്തിയാണ് ഫെസ്റ്റിവൽ ഡയറക്ടർ.ഇന്ത്യയിലെ പ്രമുഖ കലാകാരന്മാരുടെ സാന്നിധ്യം കൊണ്ട് ശ്രദ്ധേയമായ ഇൻഡോ -ബഹ്റൈൻ ഫെസ്റ്റിവൽ കാണാനും ആസ്വദിക്കാനുമായി ബഹ്റൈനിലെ മുഴുവൻ കലാസ്വാദകർക്കും അവസരമൊരുക്കുന്നതായും ഏവരെയും ബഹ്റൈൻ കേരളീയ സമാജം ഡി ജെ ഹാളിലേക്ക് സ്വാഗതം ചെയ്യുന്നതായി ബഹ്റൈൻ കേരളീയ സമാജം പ്രസിഡന്റ് പി വി രാധാകൃഷ്ണപിള്ള, ജനറൽ സെക്രട്ടറി വർഗീസ് കാരക്കൽ, ഫെസ്റ്റിവൽ കോഡിനേറ്റർ പ്രശാന്ത് ഗോവിന്ദപുരം എന്നിവർ വാർത്താക്കുറിപ്പിൽ അറിയിച്ചു.
