കൊച്ചി: നടൻ മമ്മൂട്ടിയുടെ ആരോഗ്യനില മെച്ചപ്പെട്ടെന്ന സൂചന നൽകി പേഴ്സണൽ അസിസ്റ്റന്റ് ജോർജ് എസ്. നന്ദി പറഞ്ഞുകൊണ്ടുള്ള വൈകാരിക പോസ്റ്റാണ് ജോർജ് എസ് ഫേസ്ബുക്കിൽ പങ്കുവച്ചത്. കൈകൂപ്പി നിൽക്കുന്ന മമ്മൂട്ടിയുടെ ചിത്രത്തിനൊപ്പമാണ് കുറിപ്പ്.
സന്തോഷത്തിൽ നിറഞ്ഞ കണ്ണുകളോടെ കൈകൂപ്പി നിങ്ങളുടെ മുന്നിൽ ഞാൻ നിൽക്കുന്നു. പ്രാർത്ഥിച്ചവർക്കും കൂടെ നിന്നവർക്കും, ഒന്നുമുണ്ടാവില്ല എന്ന് പറഞ്ഞു ആശ്വസിപ്പിച്ചവർക്കും പറഞ്ഞാൽ തീരാത്ത സ്നേഹത്തോടെ പ്രിയപ്പെട്ടവരെ…നന്ദി! എന്നായിരുന്നു ജോർജിന്റെ വാക്കുകൾ. ലോകമെമ്പാടുമുള്ള ഒരുപാട് പേരുടെ പ്രാർത്ഥനയ്ക്ക് ഫലം കണ്ടെന്ന് നിർമാതാവ് ആന്റോ ജോസഫും ഫേസ്ബുക്കിൽ പങ്കുവെച്ചിരുന്നു. ദൈവമേ നന്ദിയെന്നും ആന്റോയുടെ പോസ്റ്റിലുണ്ട്. എന്നാൽ മറ്റു സൂചനകളൊന്നും നൽകിയിരുന്നില്ല.
എക്കാലത്തെയും വലിയ വാർത്തയെന്ന് നടി മാല പാർവതി കമന്റ് ചെയ്യുകയുമുണ്ടായി. ഇതേ സന്തോഷം തന്നെയാണ് ഫേസ് ബുക്ക് പോസ്റ്റിന്റെ തൊട്ടുതാഴെ മലയാളികൾ പങ്കുവയ്ക്കുന്നത്.
