കൊച്ചി: കോതമംഗലം വടാട്ടുപാറയിൽ പുഴയിൽ ഇറങ്ങിയ മൂന്നുവിദ്യാർഥികൾ ഒഴുക്കിൽപ്പെട്ട് മരിച്ചു. കോതമംഗലം ബസേലിയോസ് ഡന്റൽ കോളജിലെ വിദ്യാർഥികളാണ് പലവൻപടി പുഴയിൽ ഒഴുക്കിൽപ്പെട്ട് മരിച്ചത്. കോട്ടയം സ്വദേശികളായ ബിയോൺ ബിജു (22), അതുൽ രാജ് (22) തിരുവനന്തപുരം സ്വദേശിയായ ഹരീഷ് വി.ബി. (22) എന്നിവരാണ് മരിച്ചത്. ഒൻപതു പേരാണ് പുഴയിൽ കുളിക്കാനിറങ്ങിയത്. അവധി ദിവസമായതിനാൽ പ്രകൃതിഭംഗി ആസ്വദിക്കാനായി എത്തിയതായിരുന്നു വിദ്യാർഥികൾ. നാട്ടുകാരെത്തിയാണ് മൃതദേഹങ്ങൾ നീന്തിയെടുത്തത്. സ്ഥലത്ത് മുന്നറിയിപ്പ് ബോർഡുകളൊന്നുമുണ്ടായിരുന്നില്ലെന്നും പറയുന്നു.
