തിരുവനന്തപുരം: എൽ ഡി എഫിന്റെ പ്രകടനപത്രികയിലും സ്ത്രീകൾക്ക് വാഗ്ദാനങ്ങളുടെ കുത്തൊഴുക്ക് . കെഎസ് ആർ ടി സിയിൽ സ്ത്രീകൾക്ക് സൗജന്യയാത്ര, റേഷൻ കാർഡ് അടിസ്ഥാനത്തിലല്ലാതെ എല്ലാ സ്ത്രീകൾക്കും 1,000 രൂപയുടെ സ്ത്രീ സുരക്ഷാ പെൻഷൻ എന്നിവയായിരിക്കും പ്രകടനപത്രികയിലെ ഹൈലൈറ്റുകൾ എന്നാണ് സൂചന.നിലവിൽ സാമ്പത്തികമായി പിന്നാക്കം നിൽക്കുന്ന, മറ്റുവരുമാനമാർഗമില്ലാത്ത സ്ത്രീകൾക്കാണ് 1,000 രൂപ നൽകി വരുന്നത്.സാമൂഹികക്ഷേമ പെൻഷൻ 3500രൂപയായി ഉയർത്തുന്നതടക്കമുള്ള വാഗ്ദാനങ്ങളും പ്രകടനപത്രികയിലുണ്ടാവും.
ഇന്നുതന്നെ പ്രകടനപത്രിക പുറത്തിറക്കിയേക്കും. മുൻ മന്ത്രി തോമസ് ഐസക് ചെയർമാനായ കമ്മിറ്റിയാണ് പ്രകടനപത്രികയ്ക്ക് അന്തിമരൂപം നൽകിയത്. മാത്യൂ ടി തോമസ്, പ്രകാശ് ബാബു, വർഗീസ്ജോർജ് എന്നിവരാണ് സബ്കമ്മിറ്റിയിലുള്ളത്. ഇവർ തയ്യാറാക്കിയ പ്രകടനപത്രികയുടെ കരടിന് മുഖ്യമന്ത്രി അംഗീകാരം നൽകുകയായിരുന്നു.
