കണ്ണൂർ: എഐസിസി ജനറൽ സെക്രട്ടറി കെ.സി. വേണുഗോപാലിനെ പ്രകീർത്തിച്ചും കേരളത്തിൻറെ മുഖ്യമന്ത്രി സ്ഥാനത്തേക്ക് അദ്ദേഹത്തിന് പരസ്യ പിന്തുണ പ്രഖ്യാപിച്ചും മുതിർന്ന കോൺഗ്രസ് നേതാവ് കെ. സുധാകരൻ. കേരള രാഷ്ട്രീയത്തിലെ ‘മുടിചൂടാമന്നനായി’ ഉയരാൻ കെ.സി. വേണുഗോപാലിന് കഴിയുമെന്ന് സുധാകരൻ ഫെയ്സ്ബുക്കിൽ കുറിച്ചു. തെരഞ്ഞെടുപ്പ് ഫലം വരാനിരിക്കെ സുധാകരൻറെ ഈ നിലപാട് പാർട്ടിയിൽ പുതിയ ചർച്ചകൾക്ക് തുടക്കമിട്ടിരിക്കുകയാണ്. താഴെത്തട്ടിൽ നിന്ന് സംഘടനയുടെ ഓരോ ഘട്ടവും അനുഭവിച്ച് വളർന്ന നേതാവാണ് കെ.സി. പ്രവർത്തകരുടെ മനസറിയാനും അവരുടെ പ്രതീക്ഷകൾക്ക് മറുപടി നൽകാനും അദ്ദേഹത്തിന് കഴിയുമെന്ന് സുധാകരൻ പറഞ്ഞു. കെ. കരുണാകരൻ, എ.കെ ആൻറണി, ഉമ്മൻ ചാണ്ടി, വയലാർ രവി തുടങ്ങിയ മഹാനേതാക്കളുടെ പാത പിന്തുടർന്ന് കേരള രാഷ്ട്രീയത്തെ നയിക്കാൻ കെ.സി. വേണുഗോപാലിന് സാധിക്കുമെന്ന ആത്മവിശ്വാസം പ്രവർത്തകർക്കുണ്ട്.
ഇക്കഴിഞ്ഞ നിയമസഭാ തിരഞ്ഞെടുപ്പിൽ സ്ഥാനാർത്ഥികൾക്ക് ആത്മവിശ്വാസം പകരുന്ന ശക്തിയായി കെ.സി. പ്രവർത്തിച്ചുവെന്നും അദ്ദേഹത്തിൻറെ സാന്നിധ്യം കേരള രാഷ്ട്രീയത്തിന് എത്രത്തോളം ആവശ്യമാണെന്ന് ഈ തെരഞ്ഞെടുപ്പ് തെളിയിച്ചുവെന്നും അദ്ദേഹം ചൂണ്ടിക്കാട്ടി. കേരളത്തിലെ ജനങ്ങളെയും പ്രവർത്തകരെയും പ്രചോദിപ്പിച്ച് നാളെയുടെ ഭരണത്തിന് ദിശാബോധം നൽകാൻ കഴിയുന്ന നേതാവായി അദ്ദേഹം ഉയരട്ടെ എന്നും ആ നേതൃകാലത്തിനായി പ്രതീക്ഷയോടെ കാത്തിരിക്കുന്നുവെന്നും സുധാകരൻ കുറിച്ചു.
