മൂന്ന് വർഷത്തെ ഇടവേളയ്ക്ക് ശേഷം ബഹ്റൈൻ ഇന്റർനാഷണൽ ഗാർഡൻ ഷോ (BIGS) പുതുവർഷത്തിൽ തിരിച്ചെത്തുന്നു. കൊറോണ കാരണമാണ് മൂന്ന് വർഷമായി ജനപ്രിയ ഗാർഡൻ ഷോ നടത്താതിരുന്നത്. നാഷണൽ ഇനിഷ്യേറ്റീവ് ഫോർ അഗ്രികൾച്ചറൽ ഡെവലപ്‌മെന്റ് സംഘടിപ്പിക്കുന്ന ഈ പ്രദർശനം, ബഹ്റൈൻ രാജാവ് ഹിസ് മജസ്റ്റി ഹമദ് ബിൻ ഈസ അൽ ഖലീഫയുടെ രക്ഷാധികാരത്തിലും, പ്രിൻസസ് സബീക്ക ബിൻത് ഇബ്രാഹിമിന്റെ മേൽനോട്ടത്തിലും ആണ് നടക്കുന്നത്. ഷോ അടുത്ത വർഷം മാർച്ച് 1 മുതൽ 4 വരെ ബഹ്‌റൈനിലെ എക്‌സിബിഷൻ വേൾഡ് ബഹ്‌റൈനിൽ “ജലം … ജീവിതത്തിന്റെ നവീകരണം” എന്ന പ്രമേയത്തിലാണ് സംഘടിപ്പിക്കുക. 25-ലധികം രാജ്യങ്ങളിൽ നിന്നുള്ള നാൽപത്തിഒൻപതിനായിരത്തിലധികം സന്ദർശകരെ ഈ പ്രദർശനം ആകർഷിക്കും എന്നാണ് കരുതുന്നത്.
