ഭൂകമ്പത്തിൽ തകർന്ന സിറിയയിൽ രക്ഷാ പ്രവർത്തനം തുടരുകയാണെന്നും ഇന്ത്യ ഉൾപ്പടെയുള്ള വിദേശ രാജ്യങ്ങളുടെ സഹായം ലഭിക്കുന്നുണ്ടെന്നും സിറിയൻ അംബാസിഡർ ബാസിം അൽ ഖാത്തിബ് പറഞ്ഞു. ഭൂകമ്പത്തിൽ തകർന്ന സിറിയയുടെ അവസ്ഥയെപ്പറ്റി മാധ്യമങ്ങളോട് സംസാരിക്കുകയായിരുന്നു അദ്ദേഹം. സർക്കാർ – സർക്കാരിതര സ്ഥാപനങ്ങൾ രക്ഷാ പ്രവർത്തനത്തിൽ സജീവമാണ്.മരുന്നുകൾ, ഭക്ഷ്യ വസ്തുക്കൾ, മെഡിക്കൽ ഉപകരണങ്ങൾ തുടങ്ങി എല്ലാ സഹായവും സ്വീകരിക്കും. സിറിയയിൽ വൈദ്യുതി ബന്ധം ഇനിയും പുനസ്ഥാപിച്ചിട്ടില്ല. കുടിവെള്ള വിതരണം താറുമാറായിരിക്കുകയാണ്. സിറിയൻ സർക്കാരിന് കഴിയുന്ന സഹായമെല്ലാം ദുരിധബാധിതർക്കായി ചെയ്യുന്നു.വിമത വിഭാഗത്തിന്റെ നിയന്ത്രണത്തിലുള്ള മേഖലയിലെ ജനങ്ങളെയും സർക്കാർ സഹായിക്കുന്നുണ്ടെന്നും എംബസിയിൽ എല്ലാ സഹായങ്ങളും സ്വീകരിക്കുമെന്നും അംബാസിഡർ പറഞ്ഞു.വിദേശകാര്യ മന്ത്രാലയത്തോട് ആശയ വിനിമയം നടത്തുന്നുണ്ട്.ഭൂചലനം നാശം വിതച്ച തുർക്കിയിലും സിറിയയിലും കൊല്ലപ്പെട്ടവരുടെ എണ്ണം 24,000 പിന്നിട്ടുകഴിഞ്ഞു. തുർക്കിയിൽ മരണസംഖ്യ ഇരുപതിനായിരത്തിലധികവും, സിറിയയിൽ നാലായിരത്തിലധികവും പിന്നിട്ടു.നിരവധി പേർ അവശിഷ്ടങ്ങൾക്കിടയിൽ ഇപ്പോഴും കുടുങ്ങിക്കിടക്കുകയാണ്.ഇവിടെ രക്ഷാപ്രവർത്തനം തുടരുന്നുണ്ട്. ഒരു ലക്ഷത്തിലധികം പേരാണ് രക്ഷാപ്രവർത്തനങ്ങളിൽ പങ്കാളികളായിട്ടുള്ളത് . അതിശൈത്യവും മഴയും മൂലം രക്ഷാപ്രവർത്തനം മന്ദഗതിയിലാണെന്നതും പ്രതിസന്ധിയാണ്. അടിസ്ഥാന സൗകര്യങ്ങളുടെ അഭാവമാണ് നിലവിൽ രക്ഷാപ്രവർത്തനത്തിന് വെല്ലുവിളിയായി തുടരുന്നത് എന്നും അദ്ദേഹം പറഞ്ഞു
