ഗൾഫ് രാജ്യങ്ങളെ ലക്ഷ്യമിട്ടുള്ള ഡ്രോൺ ആക്രമണങ്ങളെ ശക്തമായി അപലപിച്ച് ബഹ്റൈൻ

കഴിഞ്ഞ ദിവസങ്ങളിൽ യുഎഇ, കുവൈറ്റ്, ഖത്തർ എന്നീ ഗൾഫ് രാജ്യങ്ങളെ ലക്ഷ്യമിട്ട് നടത്തിയ ഡ്രോൺ ആക്രമണങ്ങളെ ബഹ്‌റൈൻ ശക്തമായി അപലപിച്ചു.അബുദാബിയിൽ നിന്ന് ഖത്തറിലേക്കുള്ള യാത്രാമധ്യേ സമുദ്രാതിർത്തിയിൽ വാണിജ്യ ചരക്ക് കപ്പലിനെ ലക്ഷ്യമിട്ട് നടന്ന ഡ്രോൺ ആക്രമണത്തിലും രാജ്യം അതീവ ദുഃഖം രേഖപ്പെടുത്തി.ഖത്തറിന്റെ പരമാധികാരം, സുരക്ഷ, പ്രാദേശിക ജലാശയങ്ങളുടെ സമഗ്രത എന്നിവ സംരക്ഷിക്കുന്നതിന് സ്വീകരിക്കുന്ന എല്ലാ നടപടികളെയും പിന്തുണയ്ക്കുന്നതായും ബഹ്‌റൈൻ പ്രസ്താവനയിൽ വ്യക്തമാക്കി.മേഖലയിലെ വാണിജ്യ കപ്പൽ പാതകളുടെയും സുപ്രധാന വിതരണ ശൃംഖലകളുടെയും സുരക്ഷ സംരക്ഷിക്കുന്നതിന് പ്രാദേശികവും അന്തർദേശീയവുമായ സഹകരണം വർദ്ധിപ്പിക്കണമെന്ന രാജ്യത്തിന്റെ ആഹ്വാനവും മന്ത്രാലയം പുതുക്കി.കുവൈത്തിന്റെ പരമാധികാരം, സുരക്ഷ, പൗരന്മാരുടെയും താമസക്കാരുടെയും സുരക്ഷ എന്നിവ സംരക്ഷിക്കുന്നതിനായി സ്വീകരിക്കുന്ന എല്ലാ നടപടികൾക്കും പൂർണ്ണ പിന്തുണ പ്രഖ്യാപിച്ചുകൊണ്ട്, കുവൈത്തിനോടുള്ള ബഹ്‌റൈന്റെ പൂർണ ഐക്യദാർഢ്യവും വിദേശകാര്യ മന്ത്രാലയം പ്രസ്താവനയിൽ ആവർത്തിച്ചു.