സ്മാർട്ട്ഫോൺ ഉപയോക്താക്കൾ ജാഗ്രത പാലിക്കണമെന്ന് മുന്നറിയിപ്പുമായി ബഹ്റൈനിലെ അധികൃതർ. ഫോണിൽ ആപ്ലിക്കേഷനകൾ ഇൻസ്റ്റാൾ ചെയ്യുമ്പോൾ ഡാറ്റ ചോർച്ചയും സൈബർ തട്ടിപ്പുകളും ഒഴിവാക്കാൻ അതീവ ജാഗ്രത പാലിക്കണം. ആപ്പുകൾ ആവശ്യപ്പെടുന്ന അനുമതികൾ ഔദ്യോഗിക പ്ലാറ്റ്ഫോമുകൾ എന്നിവ പ്രത്യേകം പരിശോധിക്കേണ്ടതാണ് എന്നും ആപ്ലിക്കേഷനുകൾ ഇൻസ്റ്റാൾ ചെയ്യുന്നതിനു മുൻപ് പരിശോധന നടത്തണമെന്നും അധികൃതർ പറയുന്നു.വ്യാജ ആപ്ലിക്കേഷനുകൾ ബാങ്ക് വിവരങ്ങൾ ഉൾപ്പെടെയുള്ള ഡാറ്റ മോഷ്ടിക്കാൻ സാധ്യതയുണ്ട് എന്നും മുന്നറിയിപ്പിൽ പറയുന്നു.ആളുകളെയും ഉപയോക്തൃ ഡാറ്റയെയും ലക്ഷ്യം വച്ചുള്ള ഹാനികരമായ ആപ്പുകളുടെ കൃത്യമായ എണ്ണം ലഭ്യമല്ലെന്നും, അവ ഓരോ ദിവസവും ലക്ഷക്കണക്കിന് ഉണ്ടാകാമെന്നും ഹിദ്ദ് പോലീസ് സ്റ്റേഷൻ മേധാവി കേണൽ ഡോ. ഒസാമ ബഹാർ പറഞ്ഞു.ആഭ്യന്തര മന്ത്രാലയത്തിന്റെ അൽ അമൻ സോഷ്യൽ മീഡിയ പ്രോഗ്രാമിൽ സംസാരിച്ച കേണൽ ഡോ. ബഹാർ, ഫോണുകളിൽ ഏതെങ്കിലും ആപ്ലിക്കേഷൻ ഇൻസ്റ്റാൾ ചെയ്യുന്നതിന് മുമ്പ് ശ്രദ്ധാപൂർവ്വം ചിന്തിക്കാനും അവലോകനം ചെയ്യാനും ആളുകളോട് അഭ്യർത്ഥിച്ചു.ബഹ്റൈനിൽ അലേർട്ടുകളും അറിയിപ്പ് അപ്ഡേറ്റുകളും നൽകുന്ന ആപ്പുകൾക്കെതിരെ ദേശീയ സൈബർ സുരക്ഷാ കേന്ദ്രം ഇതിനകം മുന്നറിയിപ്പ് നൽകിയിട്ടുണ്ട്.ഗൂഗിൾ പ്ലേ സ്റ്റോർ, ആപ്പിൾ ആപ്പ് സ്റ്റോർ തുടങ്ങിയ ഔദ്യോഗിക ആപ്പ് സ്റ്റോറുകളിൽ നിന്ന് മാത്രം ആപ്പുകൾ ഡൗൺലോഡ് ചെയ്യുക എന്നും അദ്ദേഹം അറിയിച്ചു.
