ന്യൂഡൽഹി: തിങ്കളാഴ്ച മുതൽ വിമാന യാത്ര നിരക്ക് ഉയരുമെന്ന് സൂചന. ഡിസംബർ മാസത്തിൽ ഇൻഡിഗോ പ്രതിസന്ധിയെ തുടർന്ന് കേന്ദ്ര സർക്കാർ ഏർപ്പെടുത്തിയ താൽക്കാലിക നിരക്ക് നിയന്ത്രണം (fare cap) ഇന്ന് മുതൽ അവസാനിക്കാനിരിക്കുകയാണ്.
സർക്കാർ വ്യക്തമാക്കുന്നതനുസരിച്ച്, വിമാന സർവീസുകൾ സാധാരണ നിലയിലേക്കു മടങ്ങിയിട്ടുണ്ട്. യാത്രാ ശേഷി (capacity) പുനഃസ്ഥാപിക്കപ്പെട്ടതും മേഖലയിൽ പ്രവർത്തനം സാധാരണമായതുമാണ് നിരക്ക് നിയന്ത്രണം പിൻവലിക്കാൻ കാരണം.
എന്നാൽ, വിമാനക്കമ്പനികൾക്ക് പ്രവർത്തന ചെലവ് ഉയർന്ന സാഹചര്യത്തിലാണ് ഈ തീരുമാനം. പശ്ചിമേഷ്യയിൽ അമേരിക്ക–ഇസ്രായേൽ–ഇറാൻ സംഘർഷം തുടരുന്നതിനാൽ അന്താരാഷ്ട്ര സർവീസുകൾക്ക് ദൈർഘ്യമേറിയ വഴിത്തിരിവുകൾ സ്വീകരിക്കേണ്ടിവരുന്നു. ഇതോടെ ഇന്ധന ഉപഭോഗവും ചെലവും വർധിച്ചിട്ടുണ്ട്.
ഇതിനൊപ്പം, എവിയേഷൻ ടർബൈൻ ഫ്യൂവൽ (ATF) വില ഉയർന്നതിനെ തുടർന്ന് വിമാനക്കമ്പനികൾ ഇതിനകം തന്നെ ഫ്യൂവൽ സർചാർജ് ഏർപ്പെടുത്തിയിട്ടുണ്ട്. ഇതും ടിക്കറ്റ് നിരക്കുകൾ ഉയരാൻ കാരണമാകുന്നു.
നിരക്ക് നിയന്ത്രണം പിൻവലിച്ചിട്ടുണ്ടെങ്കിലും, വിമാനക്കമ്പനികൾ വില നിയന്ത്രണത്തിൽ ശാസ്ത്രീയ സമീപനം പാലിക്കണമെന്ന് സർക്കാർ നിർദ്ദേശിച്ചിട്ടുണ്ട്. തിരക്കേറിയ സമയങ്ങളിലും അടിയന്തര സാഹചര്യങ്ങളിലും അമിതമായ നിരക്ക് വർധനവ് ഉണ്ടായാൽ വീണ്ടും ഇടപെടൽ നടത്തമെന്നും നിരക്ക് നിയന്ത്രണം പുനഃസ്ഥാപിക്കുമെന്നും സർക്കാർ വൃത്തങ്ങൾ അറിയിച്ചു.
